(ភ្នំពេញ)៖ដោយសារកត្តាបើកបរខ្វះការប្រុងប្រយ័ត្ន បណ្តាលឲ្យនារីវ័យក្មេង១នាក់បានស្លាប់ និង២នាក់ផ្សេងទៀតរងរបួសធ្ងន់ ដឹកទៅសង្គ្រោះនៅឯមន្ទីរពេទ្យ ក្នុងហេតុការណ៍គ្រោះថ្នាក់ចរាចរដែលបង្កឡើងដោយមនុស្សប្រុសស្រី ៣នាក់ ជិះម៉ូតូឌុបគ្នាក្នុងល្បឿនលឿន ជ្រុលទៅបុករថយន្ត ដែលកំពុងបើកបត់ត្រឡប់ ក្រោយបណ្តាលឲ្យដួលបោកក្បាលនឹងថ្នល់ នៅតាមបណ្ដោយ ផ្លូវសហព័ន្ធរុស្ស៊ី ចំណុចជាប់នឹងស្ពានអាកាស ផ្សារដីហុយ ស្ថិតនៅក្នុងសង្កាត់អូរបែកក្អម ខណ្ឌសែនសុខ រាជធានីភ្នំពេញ កាលពីវេលាម៉ោង១ និង៣០នាទីរំលងអធ្រាត្រឈានចូលថ្ងៃទី១៣ ខែកក្កដា ឆ្នាំ២០២២ ។
សពជនរងគ្រោះមានឈ្មោះ ថន ចន្ធីម ភេទស្រី មានអាយុជាង២០ឆ្នាំ ។ចំណែកអ្នករងរបួសធ្ងន់ មិនទាន់ស្គាល់អត្តសញ្ញាណ។បើតាមប្រភពព័ត៌មាននៅកន្លែងកើតហេតុបានឲ្យដឹងថា មុនពេលកើតហេតុគេបានឃើញបុរសម្នាក់ជាជនជាតិខ្មែរ រួមដំណើរជាមួយនឹងបុរសម្នាក់ទៀត ជាជនបរទេស ជិះរថយន្ត ពាក់ផ្លាកលេខ ភ្នំពេញ 2BP-6892 បើកចុះពីស្ពានអាកាសផ្សារដីហុយ តាមបណ្តោយផ្លូវសហព័ន្ធរុស្ស៊ី ក្នុងទិសដៅពីខាងកើតមកខាងលិច ក្នុងល្បឿនលឿន លុះមកដល់ចំណុចកើតហេតុខាងលើ បានបត់ឆ្វេងត្រឡប់ក្រោយ។លុះបត់ដល់ពាក់កណ្តាលផ្លូវ ក៏ស្រាប់តែគេឃើញ មានបុរសម្នាក់ រួមដំណើរ ជាមួយនឹងនារី ពីរនាក់ទៀត ជិះម៉ូតូម៉ាកហុងដា ស្គុបពី ពណ៌ខ្មៅ ពាក់ផ្លាកលេខ ភ្នំពេញ 1IV-0989 ជិះពីក្រោយ ស្របទិសគ្នា ពីខាងកើតមកខាងលិច ក្នុងល្បឿនលឿន លុះដល់ចំណុចកើតហេតុ ចាប់ហ្វ្រាំមិនទាន់ ក៏ជ្រុលទៅបុកចំពាក់កណ្តាលទ្វារ ខាងស្តាំរថយន្ត បណ្តាលឲ្យដួលបោកក្បាលទៅនឹងថ្នល់ រងរបួសធ្ងន់ធ្ងរ។ ភ្លាមនោះ ប្រជាពលរដ្ឋ បានទាក់ទងទៅរថយន្តសង្គ្រោះបន្ទាន់ភ្លាមៗ តែជាអកុសល នារីរងគ្រោះខាងលើបានបាក់ ក ស្លាប់ បាត់ទៅហើយ ។
ចំណែកបុរសនិងនារីម្នាក់ទៀត រងរបួសធ្ងន់ កំពុងតែសំរាកព្យាបាល នៅឯមន្ទីរពេទ្យឯកជន មួយកន្លែង រីឯតៃកុងរថយន្ត និងបុរសជនបរទេសម្នាក់ទៀត បានរត់គេចចេញពីកន្លែងកើតហេតុ បាត់ស្រមោល បន្សល់ទុកតែរថយន្ត នៅកន្លែងកើតហេតុ។
សមត្ថកិច្ចជំនាញចរាចរណ៍ ចុះទៅពិនិត្យ និងវាស់វែង រួចយករថយន្តស្ទូចយករថយន្ត និងម៉ូតូរងគ្រោះទៅរក្សាទុកនៅខាងការិយាល័យចរាចរណ៍ផ្លូវគោក នៃស្នងការដ្ឋាននគរបាល រាជធានីភ្នំពេញ រង់ចាំដោះស្រាយ នៅពេលក្រោយ ។ រីឯសពនារី រងគ្រោះ សមត្ថកិច្ច បានធ្វើកំណត់ហេតុ ប្រគល់ឲ្យទៅក្រុមគ្រួសារ យកទៅធ្វើបុណ្យ តាមប្រពៃណី៕
