ខេត្តបន្ទាយមានជ័យ៖ឧបទ្ទវហេតុគ្រោះថ្នាក់ចរាចរណ៍បង្កឡើងដោយម៉ូតូបុកគោយន្តកន្ត្រៃពីក្រោយ បណ្តាលឲ្យប្តីរងរបួសធ្ងន់ ប្រពន្ធរបួសស្រាល ដឹកបញ្ជូនទៅសង្គ្រោះនៅឯមន្ទីរពេទ្យភ្លាមៗ។ហេតុការណ៍គ្រោះថ្នាក់ចរាចរណ៍នេះបានកើតឡើង កាលពីវេលាម៉ោង០៧និង០៥នាទីយប់ ថ្ងៃទី០៧ ខែវិច្ឆិកា ឆ្នាំ២០២២ នៅលើផ្លូវខេត្តលេខ 2561 A ភូមិតេជោភ្នំឆ័ត្រ ស្ថិតនៅក្នុងឃុំស្វាយចេក ស្រុកស្វាយចេក ខេត្តបន្ទាយមានជ័យ ។
នគរបាលបានឲ្យដឹងថា៖ជនរងគ្រោះជាប្តីឈ្មោះ វឿត សារិត ភេទប្រុស អាយុ២៤ឆ្នាំ រងបួសធ្ងន់ និងប្រពន្ធឈ្មោះ វិន សុធា អាយុ ២៥ឆ្នាំ របួសស្រាល ជនរងគ្រោះទាំង០២នាក់ នៅភូមិតាសុងឃុំ គោករមៀត ស្រុកថ្មពួក ខេត្តបន្ទាយមានជ័យ ។
នគរបាលបានបញ្ជាក់ថា៖នៅមុនពេលកើតហេតុ ឈ្មោះ ម្រះ កាត ភេទប្រុស អាយុ ៣៣ឆ្នាំ មានលំនៅភូមិតេជោភ្នំឆ័ត្រ ឃុំស្វាយចេកស្រុកស្វាយចេក បានបើកបរគោយន្តកន្រ្តៃ០១គ្រឿងក្នុងទិសដៅពីទិសខាងកើតទៅទិសខាងលិច លុះមកដល់ត្រង់ចំណុចកើតហេតុ បានប្តូរគន្លងទិសផ្លូវបំរុងចូលផ្ទះ ស្របពេលនោះ អ្នកបើកម៉ូតូម៉ាក វេវ អាវកាច់ ពណ៌ឈាមជ្រូក គ្មានស្លាកលេខ ដឹកប្រពន្ធពីក្រោយ បើកក្នុងទិសដៅពីលិចទៅកើតក្នុងល្បឿនលឿនបុកចំទ្រុងគោយន្ដផ្នែកខាងក្រោយជំហៀងខាងស្ដាំ បណ្តាលឲ្យប្តីអ្នកបើកម៉ូតូ របួសធ្ងន់ ដឹកទៅសង្រ្គោះនៅមន្ទីរពេទ្យបង្អែកមង្គលបូរីនិងប្រពន្ធរបួសស្រាល។សម្ភារៈទាំង០២ខូចខាតស្រាល ត្រូវបានរក្សាទុកនៅអធិការដ្ឋាននគរបាលស្រុកស្វាយចេក ដើម្បីរងចាំធ្វើការដោះស្រាយនៅពេលក្រោយ ៕
