ខេត្តកំពត៖មនុស្ស១នាក់បានស្លាប់ និង៩នាក់ទៀតរងរបួសធ្ងន់–ស្រាល ខណៈរថយន្តម៉ាកសាមយ៉ុងមួយគ្រឿងដឹកមនុស្សមកពីចូលរួមខួបកំណើតគេ ហើយបានបោះពួយទៅបុកកន្ទុយរថយន្តខ្នាតធំមានសណ្តោងកន្ទុយពីក្រោយពេញទំហឹង នៅលើកំណាត់ផ្លូវជាតិលេខ៣១ក្នុងទិសដៅស្របគ្នា។
ហេតុការណ៍ដ៏រន្ធត់នេះបានកើតឡើងកាលពីវេលាម៉ោង២២និង៣០នាទីយប់ ថ្ងៃទី២១ ខែតុលា ឆ្នាំ២០១៩ ត្រង់ចំណុចភូមិជ្រោះសោម ឃុំប្រាសាទភ្នំខ្យង ស្រុកកំពង់ត្រាច ខេត្តកំពត។
លោក សេង សុគន្ធចាត់ អធិការនគរបាលស្រុកកំពង់ត្រាចបានឲ្យដឹងថា ករណីគ្រោះថ្នាក់ចរាចរនេះបានកើតឡើងនៅពេលយប់រវាងរថយន្តម៉ាកសាមយ៉ុងបុកជាមួយរថយន្តសណ្តោងមិនស្គាល់ម៉ាក ក្នុងទិសដៅស្របគ្នាពីត្បូងទៅជើង ហើយការប៉ះទង្គិចនេះដោយសារអ្នកបើកបររថយន្តសាមយ៉ុងខ្វះការប្រុងប្រយ័ត្នថែមទាំងបើកក្នុងល្បឿនខ្លាំង ទើបជ្រុលទៅបុកគូទរថយន្តសណ្តោងពេញទំហឹង បណ្តាលឲ្យអ្នកដំណើរក្នុងរថយន្តស្លាប់និងរបួស ហើយរថយន្តក៏ជ្រុលធ្លាក់ចេញពីទ្រូងផ្លូវតែម្តង។
លោកអធិការបានបញ្ជាក់ទៀតថា ជនរងគ្រោះដែលស្លាប់ក្នុងហេតុការណ៍នេះ មានពីរនាក់ ទី១–ឈ្មោះ ហួន អង្គាតេពី ភេទស្រី អាយុ២៦ឆ្នាំ ,ទី២–ឈ្មោះ មូលពុធថា ភេទស្រី អាយុ២ឆ្នាំ ជនរងគ្រោះទាំងពីរនាក់រស់នៅភូមិស្រែសំរោង ឃុំភ្នំកុង ស្រុកអង្គរជ័យ ខេត្តកំពត។
ដោយឡែកអ្នករងរបួសទី១–ឈ្មោះ ញ៉ែម សារិន ភេទស្រី អាយុ៥៣ឆ្នាំ របួសធ្ងន់,ទី២–ឈ្មោះ សូត្រ តូន ភេទស្រី អាយុ៥៤ឆ្នាំ របួសធ្ងន់,ទី៣–ឈ្មោះ អ៊ូច វុទ្ធី ភេទប្រុស អាយុ៣៦ឆ្នាំ របួសធ្ងន់ ទាំងបីនាក់រស់នៅភូមិស្រែសំរោង ឃុំភ្នំកុង ស្រុកអង្គរជ័យ ខេត្តកំពត។ទី៤–ឈ្មោះ មីង យ៉ា ភេទស្រី អាយុ៥៧ឆ្នាំ រស់នៅភូមិឈើទាល ឃុំម្រោម ស្រុកអង្គរជ័យ ខេត្តកំពត។ចំពោះជនរងគ្រោះចំនួន៥នាក់ទៀតមិនស្គាល់អត្តសញ្ញាណទេ ព្រោះពេលកើតហេតុត្រូវបានសាច់ញាតិដឹកទៅសង្គ្រោះភ្លាមៗ។
បច្ចុប្បន្នអ្នកស្លាប់ក្នុងហេតុការណ៍គ្រោះថ្នាក់ចរាចរត្រូវក្រុមគ្រួសារដឹកទៅកាន់លំនៅដ្ឋាន ដើម្បីចាត់ចែងធ្វើបុណ្យតាមប្រពៃណី៕